Поранешната НБА-ѕвезда, Ражон Рондо во неделата бил уапсен во Индијана поради нелегално поседување огнено оружје и дрога. Рондо е двократен шампион во НБА-лигата со Бостон и Лос Анџелес лејкерс.
Плејмејкерот, кој ја заврши играчката кариера пред две сезони бил запрен од полицијата откако направил сообраќаен прекршок. Полицајците при рутински претрес во автомобилот на Рондо пронашле огнено оружје и марихуана. Веднаш бил уапсен, бидејќи тој има судски налог со кој му се забранува поседување огнено оружје. Во 2022 година бил обвинет за насилничко однесување и закана со огнено оружје кон жена. Сепак, сите постапки против Рондо за овој случај биле повлечени откако се спогодил со жртвата.
Кошаркарот мина 16 сезони во НБА-лигата, а освои две шампионски титули, една со Бостон и втората со Лос Анџелес Лејкерс.