Машката кошаркарска репрезентација ги почна подготовките за претстојниот настап на претквалификациите за Олимписките игри.
Селекторот Александар Јончевски се уште не може да смета на сите повикани кошаркари, но веќе од следната недела се очекува тој на располагање да го има комплетниот состав.
Пред нашиот тим е огромен предизвик со оглед на фактот дека во последниве години не сме биле дел од турнир на кој настапуваат селекции кои се редовни учесници на големите натпреварувања пред се во Европа.
” Се подготвуваме, макар што сеуште не сме комплетни, односно, допрва треба да се комплетираме. И искрено се надевам дека ќе имаме доволно време до пријателските натпревари да се подготвиме, и да дадеме некој свој максимум. Краток е периодот на подготовки. И нема доволно време за натпревари. Од таа гледна точка, натпреварите се добредојдени. Ако има уште некој меч, тоа би било голем плус. Меѓутоа, тоа е што е, мораме да се подготвиме најдобро што можеме”, рече Андреј Маслинко.
Во Талин репрезентацијата на Македонија за противници ги има селекциите на Естонија, Израел и Чешка.
“Да бидам искрен, не ги познаваме, сеуште, доволно ростерите на противниците. Јас се надевам на успешни игри. Ќе одиме максимално, до крај. Ќе одиме на победа на секој натпревар. И се надевам дека можеме да се надигруваме со сите селекции кои ќе бидат таму во Талин”, заврши македонскиот репрезентативец.
ФОТО: Игор Паневски