По УЈП и вработените во Царинската управа излегуваат на протести. Од ССМ за Телма велат дека во петок на пладне работниците и од овој орган кои е под капата на Минисетртвото за финансии ќе излезат за да го искажат својот револт.
Инаку, Царинската управа веќе има и нов директор. На местото на Славица Котуров доаѓа поранешниот градоначалник на Карпош Стефан Богоев.
„Како што најавивме дека ќе имаме жешко синдикално лето, в петок од 12 часот имаме протест во Царинската управа. Вработените во Царинската управа, иако со години имаат право на додаток од 30 отсто, тие не го добиваат. Тие обезбедија 30 отсто покачување на платата во Министерство во финансии, во други институции не добиваат. Ќе направиме предупредувачки протест за вработените во Царинската управа, кои го полнат буџетот со повеќе од 50 отсто. Знаеме дека има нов директор, чекаме прием, да видиме дали ќе нѐ сослуша. Не се откажуваме од барањето. Не нѐ интересира дали има нов или стар директор“, посочи Сојузот на синдикатите.
Не се исклучува бунтот да се радикализира. „Ќе се радикализираат и протестите, размислуваме за затворање гранични премини“, посочија од Сојузот на синдикатите.
Вработените во Царинската управа се само едни од низата што си ги бараат ветените додатоци.