Македонската машка одбојкарска репрезентација ја забележа и втората победа во годинешното издание од Златната европска лига.
Вечерва во арената Борис Трајковски, Македонија по голема борба во меч што траеше 131 минута во пет сета ја совлада Хрватска.
Нашите одбојкари одлично го отворија мечот и првите два сета ги решија во своја полза со 25:17 и 25:22. По одличното отворање се очекуваше лесна задача и победа со максимален резултат, но Хрватска успеа да направи пресврт и во следните два сета славеше со 25:22 и 31:29.
И во петтиот решавачки сет се водеше жестока битка, но на крајот македонските репрезентативци славеа со 16:14 и триумфираа со 3:2.
ФОТО: Игор Паневски