Само неколку часа по објавувањето на одлуката на комесарот за натпреварување во кошаркарската Прва лига за забрана на водење на екипата на 10 натпревари, МЗТ Скопје реши да ја прекине соработката со тренерот Драган Николиќ.
“Управата на клубот жали што дојде до ваква ситуација пред самиот крај на домашната сезона, во ситуација кога се бориме за десеттата шампионска титула во клупската историја. Популарниот Гаги имаше долги разговори со челниците на сино-белите, во кои беше дискутирана ситуацијата околу одлуката на КФМ и во кои дојде до взаемна согласност дека ваквата разврска е најчесен чин за клубот, по што уште еднаш искажа огромна љубов и потврди дека го оставил своето срце на најдобар начин на кој сметал дека ќе донесе резултат. МЗТ Скопје Аеродром му се заблагодарува на Николиќ за сѐ што направи за време на престојот во „Јане Сандански“ и му посакува многу среќа во понатамошната кариера, со надеж дека патиштата повторно ќе ни се судрат некогаш во понатамошната иднина”, се вели во информацијата објавена на клупската веб страница.
На чело на екипата до крајот на сезоната ќе биде досегашниот прв помошник Васко Атанасов, кој веќе еднаш ја имаше улогата на прв тренер и тоа на гостувањето во Сплит во АБА лигата каде МЗТ Скопје успеа да забележи победа.
ФОТО: Игор Паневски