Банкарската гаранција на бугарската фирма „Балкан Јутилитис“ доставена на тендерот на ЕСМ Продажба за набавка на гас останува тајна.
ЕСМ и ЕСМ Продажба го игнорираа и го прекршија Законот за слободен пристап до информации од јавен карактер и во законски предвидениот рок не одговорија на барањето и не ја доставија на увид банкарската гаранција.
Барањето на 18 јануари беше поднесено до Владата и до ЕСМ. Владата се прогласи за ненадлежна и соопшти дека барањето го препраќа до ЕСМ како имател на информацијата.
На 20 јануари и државната компанија се прогласи како ненадлежна односно дека не е имател на информацијата – банкарска ганација на „Балкан Јутилитис“ и дека барањето е испратено до ЕСМ Продажба од кога почна да тече рокот од 5 дена.
Интересно е што ЕСМ Продажба која е фирма ќерка на ЕСМ, и преку која одат набавките на струја и гас вредни стотина милиони евра, нема назначено лице за слободен пристап до информации за јавен карактер нешто што е нејзина обврска и е флагрантно кршење на Законот и се коси со изјавите на раководството на ЕСМ и Владата за целосна и максимална транспарентност.
Токму затоа и во одговорот доставен од ЕСМ не е наведено лицето за контакт па не е јасно кој воопшто треба да го одговори прашањето во ЕСМ продажба и потоа да им го достави на ЕСМ кои се изјаснија дека не ја поседуваат информацијата однонсо банкарската гаранција.
Инаку според пишувањата во медиумите, бугарската фирма Балкан Јутилитис 2019 и 2021 работела со загуби па затоа се поставува прашањето која банка издала банкарска гаранција за компанија која испорачувала вакви резултати.
Огнен Чанчаревиќ