ДУИ и СДСМ и нивните лидери во оркестриран напад на Телма. Али Ахмети ја обвини дека е „непријател на албанците“, а Димитар Ковачевски, наместо да се огради од вакви напади врз медиумите, ја осуди уредувачката политика.
„Сигурно господинот Ахмети таа изјава ја дал врз основа на одредени факти и за објаснување ќе треба да го прашате него. Јас имам свое лично мислење“, изјави Ковачевски. Запрашан какво е тоа мислење, и дали телевизиите Телма и Алфа се однесуваат „антиалбански“, одговори:
„Во државата има медиум чија уредувачка политика која повеќе наликува на политиката на една компанија која тргува со енергенси, а има и медиум чија уредувачка политика повеќе личи на уредувачка политика на партиски сектор за комуникација“.
Присутните новинари гласно изреагираа на избегнувањето директно да се именуваат медиумите на кои премиерот јасно и препознатливо алудира. Но, упатија и опомена дека ова е напад на сите медиуми и дека не смее да се врати времето кога некои медиуми беа етикетирани од страна на Владата.
Милка Смилевска од Ал Џезаира се почувствува засегната. Го потсети Ковачевски дека една година е премиер и дека сигурно веќе е свесен за силината на позицијата што ја има и пораките што ги испраќа од таа позиција.
„Нападот врз два медиуми не е во ред. Тоа е напад врз сите медиуми и врз сите нас. Се чувствуваме загрозено. Вашата политичка моќ наспроти моќта на медиумите е несразмерна. Голем дел од новинарите и медиумските работници тука бевме сведоци на едно време кога бевме многу етикетирани и се чувствувавме загрозени. Голем дел од нас дадоа голем придонес за да се надмине тоа време и да дуваат малку подемократски ветришта. Верувајте дека нема да дозволиме да се врати тоа старо време. Македонија во демократијата треба да оди напред а не да се враќа назад“, рече Смилевска.
„Првин, вие сте свесни дека ние сме држава која има апсолутно унапредена транспарентност од 100%. Многу сум свесен за тоа. Не спомнав ниту еден конкретен медиум. Друга работа е ако некој се препознал. Второ, никогаш не се случило новинар или уредник од мене да добие телефонски повик. И, така ќе биде и во иднина. Јас, заедно со вас, нема да дозволам да се врати тоа време.“, одговори Ковачевски.
Ковачевски не е првиот премиер што етикетира медиуми, прозива за пристрасно и непрофесионално известување и врши притисок врз слободата на изразување. Изминативе години тоа веќе го правеа поранешните премиери Никола Груевски и Зоран Заев, кои гледаа „непријатели“ и „политички опоненти“ во некои медиуми.
Соња Николовска
Соња Николовска