Општините и фирмите не сакаат да се вратат на отворен пазар и да купуваат струја по берзански цени.
Ова им го налага владината одлука , во која стои дека по Нова Година, тие повеќе нема да можат струја да добиваат на регулиран пазар, од каде што се снабдуваат домаќинствата и која е поевтина.
Од ЗЕЛС за Телма соопштија дека веќе испратиле допис до Уставен суд, со кој бараат, Општините да бидат изземени од оваа владина одлука.
„Испративме доспис до Уставен суд со кој бараме за нас да не важи оваа одлука или да биде одложена, затоа што Општините не може да се ставаат во ист кош со бизнис секторот и компаниите кои прават профити. Од друга страна, ако Општините од први јануари треба да бараат нов снабдувач со струја, постапката трае повеќе од три месеци. Струјата на берзите пак се уште е многу скапа и ќе биде сериозен товар за работењето, а Општините законски имаат право да бидат дел од регулираниот пазар. На управниот одбор на Зелс една од главните точки ќе биде токму ова прашање“ – велат до ЗЕЛС.
Компаниите пак се жалат во ЕВН. Од таму за Телма велат дека до нив секојдневно пристигнуваат претставки од фирми и бараат да продолжат со струја да се снабдуваат на регулиран пазар.
Но, од компанијата потенцираат дека тие не се местото каде што треба да се жалат и дека ЕВН ќе ја почитува владината одлука сите кои не припаѓаат, од први јанаури да се вратат на отворениот пазар на струја.
Листата на фирми и општини кои со посебен метод дојдоа до поевтина струја е долга и тука влегуваат голем број компании чии имиња се познати во јавноста.
КОД веќе објави некои од имињата. На списотк има фирми од речиси сите дејности.
За ваквата скандалозна шема, алармот уште на почетокот на годинава го вклучи Регулаторна. Проблемот одекна и во јавнсота, а списокот на шемаџиите дојде и во рацете на Финансиската полиција, а од скоро го доби и УЈП. Финансова провери голем дел од компаниите и извештајот го достави до обвинителството.
Но, од таму велат, предистрагата продолжува ќе се проверуваат и сметководствените евиденции.
Ирена Чачкова