Ист производ – различни цени. Едни на рафтови, но други на каса. Но, измама не се прави само со цените туку и со грамажата. Дел од трговците ја намалуваат грамажата, но ги зголемуваат цените, велат граѓаните. Револтирани што во време на економска криза ова е тешка кражба. И покрај тоа што државата ги помогна компанијата и индустријата до сега ниту денар не ги поефтинија своите производи.
Граѓаните не молчат пред институциите. Низа поплаки за измами и манипулација со цените стигнале и до Организацијата на потрошувачи. Оттаму велат единствен начин да се стави крај на самоволието на трговците се високите казни.
Сѐ уште се чека конкретен потег на власта кој би ја спречил нереалната заработка на трговците, кои неконтролирано ги зголемуваат цените. Прехранбените производи од ден на ден добиваат се повисока цена за која министерот за економија Крешник Бектеши очекува поевтинување во наредните 10 дена.
Но, официјални најави од производителите нема, тие сѐ уште калкулираат дали и за колку ќе ги намалат цените на основните прехранбени производи. Бектеши тврди дека инспектори на Државниот пазарен инспекторат се на терен и веќе изрекле неколку казни. Останува отворено прашањето дали тие се доволно ригорозни и ќе имаат ли ефект.
Симона Петровска