Со ископ на нови количини на јаглен од рудникот Гуштерица во РЕК Осломеј, од Државни електрани најавија дека ќе го стабилизираат производството на електрична енергија во оваа дотраена Термоелектрана.
На јагленовиот коп каде ЕСМ денеска ги донесе и медиумите, веќе се прават подготовки, а за оваа грејна сезона планирана е откривка од 150.000 тони јаглен.
Производствената цена на рудата ќе биде за 2 до 3 пати пониска од берзанската, а со понатамошната откривка на јаглен ќе се продолжи векот на работа РЕК Осломеј за уште три години. Потоа ќе почне транзицијата за производство на струја од обновливи извори, соопштија од ЕСМ.
- Со овој јаглен ќе го подобриме производството на РЕК Осломеј. Вкупните количини што се на овој локалитет се два милиони тони што значи во наредните 3-4 години РЕК Осломеј ќе може континуирано да се снабдува со сопствен јаглен. Со тоа ќе имаме зголемено производство на електрична енергија и намалена цена на произведена мега ват час од локалитетот во Осломеј, изјави Васко Ковачевски, генерален диркетор на АД ЕСМ.
РЕК Битола и натаму работи со две третини од капацитетот. Трансформаторот за Третиот блок кој изгоре лани во пожар, веќе е готов и деновиве треба да отпочне неговиот транспорт од Турција. Се доцни поради комплетирање на документацијата во сите три држави низ кој ќе минува товарот тежок над 200 тони.
- Очекувано пристигнување на трансформаторот во РЕК Битола е 15 ноември, што е 15 дена повеќе од она што ние го планиравме, но е согласно со договорот. Од 15 ноември е предвидено да биде вклучен Третиот блок во РЕК Битола, а да се стави во ремонт блок 2, значи да има замена на блоковите, изјави Ковачевки.
Ковачевски информираше дека ЕСМ во моментот целосно ги задоволува потребите на струја од своите производни капацитети, РЕК Битола, Осломеј и хидропотенцијалот, а поради поволните времснките услови потрошувачката е намален за 15 проценти. Но, од Државни електрани велат дека сите нивни капацитети се подготвени да ги обезедат потребните количини на струја за сите потрошувачи на регулираниот пазар и за сите оние кои склучуваат догвори со ЕСМ.
Емилија Мисирлиевска