Загарантираниот минималец не го добиле вработени во приватниот, но има и во јавниот сектор. Според податоците од Управата за јавни приходи на 13.444 работници на сметките им пристигнала плата, која е под 18.000 денари, од нив најголемиот дел или 11.437 се во приватниот, а 2.007 лицата се во јавниот сектор. Откако УЈП ќе направи детална анализа ќе го извести Државниот трудов инспекторат. За Телма информираат дека бројките се менуваат од ден на ден, некои од фирмите кои добиле известување од УЈП побрзале да им ги доисплатат парите до минималната плата, за да не платат казни.
Најголем дел на работодавачи кои исплатиле плата под минималната се од дејностите: фризерски и салони за разубавување, одржување и поправка на моторни возила, сметководствени и книговодствени ревизорски работи, даночно советување, товарен и патен транспорт, трговија на мало во неспецијализирани продавници за храна и пијалоци, тутун, ресторани, објекти за подготовка и послужување на храна, производство на друга горна облека, велат од УЈП.
Трудовите инспектори се постојано на терен, откако заврши рокот за исплата на минималецот, вели за Телма директорката Весна Томовска. Акцент се става на источниот регион, каде е сконцентрирана текстилната индустрија и во која вообичаено се исплаќа минималната плата. Трудовиот инспекторат ќе ги преземе и конечните анализи од УЈП, по што ќе постапат. Казните за фирмите има, но пред да се дојде до нив фирмите се опоменуваат.
Томовска најави дека Трудовиот инспекторат на својата веб страница ќе ги објави фирмите кои нема да ја исплатат минималната плата, како и казните кои ќе ги заработат. Кристина Ампева од Гласен Текстилец пред два дена за Телма рече дека во рок од пет дена кај нив околу 1.000 текстилни работници пријавиле оти не добиле минимална плата и тоа за редовно работење, а 970 работници ја добиле, но не им се исплатени додатоците.
Викторија Димитрова Јованова
