Се заплетка ли Владата во мерките што самата ги носи за справување со шоковите од кризата?!
Требаше да ги ублажи последиците- но во пракса најголемиот товар од кризата го префрли на компаниите и на граѓаните.
Па сега цехот од мерките кои требаше да го амортизираат повисоките цени на енергенсите и храната од руската инвазија на украина, го плаќаат бизнисот – преку ограничената или анулирана заработувачка како и граѓаните за кои практично се поскапе.
Експертите се категорични – владините мерки се повеќе популистички и за билдање рејтинг- отколку добро осмислени и применливи во пракса.
„Не може некого да тераш, приватен бизнисмен да продава леб со нула добивка. И тоа значи исто како господата министри да работат бидејќи е криза без плата. Товарот на последиците сега катастрофално не се одразува праведно кај сите туку кај еден сегмент, прво фирмите кои се занимаваат со снабдување на прехрамбени продукти и дериватите.“ – вели поранешниот министер за финансии, Џевдет Хајредини.
Надлежните во изјавите се заплеткуваа, па како растеше паниката и кризата – едно кажуваа па се повлекуваа.
Се тргна со замарзнувањето на цените на храната па потоа од 1 март со одмрзнувањето на цените на храната и замрзнувањето на маржите за трговците. И погрешните анализи кои за владините претставници покажале дека цените на храната нема да растат- туку ќе се намалуваат.
„Ние очекуваме за производите кои ги наведов, тринаесетина се производи, а финални производи се некаде десет производи, да има намалување. Во случај да нема, секако ќе се засилат контролите“ – тврдеше министерот за економија, Крешник Бектеши.
Но праксата покажа повисоки цени токму на таргетираните производи- но и празни рафтови по продавниците. Рекордно високи цени на горивата- и колони возила на бензинските.
Па Владата реши да ги собере експертите и бизнисот и да договорат нови мерки. Експертите препорачаа државна помош за компаниите и за граѓаните- владата одлучи уште да им ги намали маржите на трговците.
Ги обвини дека се воени профитери. Им прати и инспекциите- паднаа и казни за 7 големи маркети од 7.000 евра оти не ги намалиле маржите.
Но вчера инспекторите прстот го вперија кај производителите. Сега ќе контролираат дали цените пораснале оти нив им поскапеле суровините и трошоците за производство.
„Ние сега нашите инспекциски надзори покрај трговците ќе ги насочиме и кон производителите да утврдиме на каков начин тие ја формираат цената“ – изјави вчера директорката на ДПИ, Анета Симеска Димоска.
Владата донесе 26 мерки кои според нејзините пресметки чинат 400 милиони евра. Намалената акциза и ДДВ требаше да ги намалат цените на горивата.
„Дизелот наместо 85, 5 денари би се намалил за 10,5 денари и би изнесувал 75 денари. Бензинот наместо 91,5 денари би се намалил околу 11,5 денари и би изнесувал 80 денари- изјави Ковачевки“ – тврдеше премиерот Ковачевски на 9-ти март.
Но додека собранието ги донесе измените- берзите и Регулаторна ги дигнаа цените на горивата.
Регулаторна донесе одлука да ги намали и маржите на трговците со нафта сури за 33 проценти.
Вети ќе ги врати кога собранието ќе ги усвои измените.
А со изјавите ретерираше и првиот финансиер Бесими. Само пред две недели тврдеше дека буџетот е стабилен има пари за справување со кризата и нема потреба од ребаланс.
За сега да каже – се прават пресметки, ребаланс ќе има.
И отако функционерите воопшто не разговарале – а јавноста ги повикаа да покажат солидарност која ја бараат од компаниите и граѓаните– да си ги намалат платите, да се откажат од службените возила и други трошоци, Бесими сега вели- одлука за штедење ќе има.И тоа не само за министрите – туку ќе треба да ја применуваат и градоначалниците и директорите.
Александра Филиповска