Белорускиот претседател Александар Лукашенко денеска пристигна во Москва на разговори со неговиот руски колега Владимир Путин, што би можело да одреди колку долго ќе трае руското воено присуство во поранешната советска република, која граничи со Украина на север.
Руските воени вежби во Белорусија треба да траат до недела и ги продлабочија стравувањата на Западот дека Москва подготвува напад врз Украина која граничи со двете земји.
Русија негира дека планира инвазија, а и Минск и Москва велат дека руските трупи, најголемите распоредени во Белорусија од Студената војна, ќе се повлечат откако ќе завршат маневрите.
Сепак, пораките на Лукашенко сугерираат дека руските трупи всушност би можеле да останат подолго.
„Каква и да донесат одлука утре, тоа ќе биде така“, рече Лукашенко.
„Ако одлучиме, ќе ги повлечеме во рок од 24 часа. Ако одлучиме еден месец, тогаш тоа ќе остане еден месец. Вооружените сили ќе останат онолку колку што е потребно“, рече белорускиот претседател.
Тој додаде дека Москва и Минск одлучиле да ја остават муницијата во Белорусија и дека Минск може да купи воена опрема од Русија или тоа едноставно ќе биде руски подарок.
Воените вежби покажуваат дека Москва ја стегна контролата врз Минск.
Лукашенко дури рече дека нуклеарното и уште понапредно оружје може да биде распоредено во Белорусија доколку се соочи со какви било надворешни закани.
„Доколку нашите противници преземат такви апсурдни чекори, не само нуклеарно, туку и понапредно оружје ќе биде распоредено во Белорусија со цел да се заштити нашата територија“, рече Лукашенко.
„Ако нема да има закани од непријателските земји, тогаш не ни треба нуклеарно оружје овде“, рече тој.
Авторитарниот политички лидер Лукашенко, кој владее со Белорусија од 1994 година, со години се спротивставува на идејата да дозволи постојана руска воена база на неговата територија, претставувајќи се себеси како политичар кој не застанува ниту на истокот, ниту на западот.
Меѓутоа, бидејќи Путин му пружи политичка и економска помош за задушување на антидемократските протести во 2020 година, предводени од белоруската опозиција, Лукашенко повеќе не се обидува да го задржи ликот на автономија.
Френк Виачорка, советник на белорускиот опозициски лидер Светлана Тихановскаја, го опиша Лукашенко како московски вазал.
„Гледаме како Лукашенко го предава белорускиот суверенитет“, напиша Виачорка на Фејсбук.