Шефот на американската дипломатија, Ентони Блинкен ќе има состанок следната недела со рускиот колега, Сергеј Лавров, „доколку Русија не ја нападне Украина“, соопшти доцна синоќа Стејт департментот, јавија Бета.
Портпаролот на американската дипломатија, Нед Прајс, изјави дека Блинкен му понудил состанок на Лавров, во Европа, Русите прифатиле и понудиле датуми за крајот на наредната недела. Тие се согласиле, но, како што појасни Прајс, под услов да не дојде до руска инвазија врз Украина.
– Доколку извршат инвазија во наредните денови, тоа јасно ќе покаже дека никогаш не ни биле сериозни кога е во прашање дипломатијата, додаде Прајс.
Според официјално лице во Белата куќа, американскиот претседател Џозеф Бајден денеска ќе разговара со „со трансатлантските лидери за руските војници, кои се насобрани на границата со Украина“, како и за напорите за доминација на дипломатијата во решавање на украинско-руската криза.
