Македонскиот игран филм за деца „Стела“, во режија на Стојан Вујичиќ, освои Сребрена плакета на „ Chinh India Kids Film Festival“, што се одржа по 15 пат. Ова е трето фестивалско признание за филмот, работен како копродукција меѓу Македонија, Србија и Германија. Македонски продуцент е „ Дрим фектори“.
- Целта на 15-тиот „Chinh India Kids Film Festival“ е да се всади вкус за квалитетна детска програма и да се генерира свест за новите жанрови, иновации и формати кои го поврзуваат образованието со прашањата за култура и развој кај децата. На овој фестивал е важно мислењето на децата и тие одлучуваат за победниците на филмскиот фестивал. Токму затоа успехот на „Стела“ и добивањето сребрена плакета е огромен, велат од „Дрим фектори“.
Фестивалот „Chinh India Kids Film Festival“, е основан по повод 60-годишнината од независноста на Индија, со цел да се слави знаењето, идеите и перспективите за културата и образованието во контекст на детскиот развој.
Покрај „Дрим фектори“ и продуцентот Огнен Антов, во реализацијата на филмот беа вклучени и српската „Акција продукција“ и германската „Моуна“. Филмот беше финансиски поддржан од нашата Агенција за филм, Филмскиот центар на Србија и Филмскиот фонд Баден Вунтерберг во Штутгарт, Германија.
Во филмот главен лик е шарпланинката Стела, првпат во долгометражно остварување настапува младиот Петар Маниќ, а играат и Дејан Лилиќ, Тони Михајловски, Симеон Дамески и српската актерка Христина Поповиќ. Сценариото е на Ева Камчевска, кинематографер е Горѓи Клинчаров, костимограф е Милена Миленковиќ, монтажер е Данчо Стефков, а композитор Оливер Јосифовски од групата „Љубојна“.