На три дена пред крајот на пописот граѓани реагираат дека кај нив попишувачите сѐ уште не поминале. Таква сцена денеска забележавме во општината Ѓорче Петров.
Кај црвената зграда е попишано, во нашата портокалова, не е. Јас сум стално дома, не знам, ни изјави една незадоволна граѓанка.
А во населбата Лисиче на бандера се закачени повици до граѓаните да одат да се попишат во општината Аеродром. Кога се јавивме на еден од оставените телефонски броеви на попишувачите, ни беше речено дека тие ги завршиле реоните, дека се ставени да дежураат во месните заедници за попишување, каде непопишаните граѓани можат да се попишат.
Директорот на ДЗС, Апостол Симовски демантира дека попишувањето по домовите е завршено. Според него, од ДЗС не оставаат вакви информации по бандери, туку непронајдените граѓани од попишувачите се информираат со формилари или телефонски броеви оставени пред нивните домови, за да се договорат со попишувачите повторно да поминат кај нив.
Имаме многу такви сили кои прават се пописот да не се реализира како што треба. И им прават вакви дезинформации на граѓаните, вели Симовски.
И од општината Ѓорче Петров, негираат дека попишувачите не се на терен.
Имаме во комисијата едно лице , попишувач каде што можат да дојдат граѓани кои што треба да патуваат или не се тука евентуално до четврток. Значи можат да се попишат тука. Инаку попишувачите се на терен. Не е точно дека се повлечени, Ленче Неданоска, државен инструктор во пописен реон „Ѓорче Петров“.
Од ДЗС ги повикуваат граѓаните да ги пријавуваат , како што велат, произволните изјави од попишувачи дека пописот на терен е завршен. Попишувањето по оштините е со цел да ги опфати сите граѓани, велат од таму.
По било кој основ попишувачот бил, ама не ги нашол, не биле тука, биле на пат, сепак имаме продолжено лето, граѓаните биле по викендици, по куќи и станови во овој период и не биле тука кога бил попишувачот, вели Симовски.
Пописот завршува на 30 септември. Заклучно со вчера се попишани над 1 милион 540 илјади и 300 граѓани.
Сотир Трајков