Новиот газда на Македонски пошти, било сам или во партнерство со државата пак ќе добие монопол. Владата пак ја одложува либерализацијата на поштенскиот пазар во земјава за две години – до крајот на 2022 година. Предлогот за измени во Законот за поштенски услуги веќе е во Собранието. Дали со ова наместо државен ќе добиеме приватен монопол во поштенските услуги?
Министерот за економија Бектеши вели, бидејќи ќе се прави физибилити студија и ќе се разговара за моделот на приватизирање, затоа била одложена и либерализацијата на поштенскиот пазар во земјава. Според министерот буџетот мора да се ослободи од државните загубари меѓу кои е Македонски пошти.
Откако ќе имаме физибилити студија и наодите кои што ќе ги има во таа физибилити студија секако ќе седнеме, ќе разгледаме и ќе донесеме соодветна одлука. Секако дека треба да имаме во предвид дека сите АД, ЈП кои работат во загуба ние треба да најдеме модели кои што се современи и со последните модели кои што се искористуваат и преку јавно-приватно партнерство кое денеска го правиме и со Обединетото кралство и со Светската Банка се со цел тие да ги подобрат и услугите но истовремено да немаат и негативен импакт што се однесува до нашиот буџет. – вели Бектеши.
Нелиберализираниот поштенски пазар беше и една од забелешките на Европската унија во извештаите за напредокот на земјава. Се бараше итнa либерализација.
Во нашиот извештај за 2020-та година, ние навистина регистриравме дека отворањето на поштенскиот пазар беше повторно одложено, ограничувајќи го обезбедувањето квалитетни услуги на граѓаните и бизнисите. Ние препорачуваме Северна Македонија да продолжи да го усогласува своето законодавство со европското и да ја заврши либерализацијата на поштенскиот пазар, изјави за Телма, Зои Мулетие, од прес службата за добрососедство и проширување на ЕК
Но сите влади низ годините на хартија го либерализираа пазарот, за во последен момент да ja одложат за некоја година.
Од Антимонополската управа немаа коментар за тоа што се предлага Пошти и наредните две години да остане монопол.
Националната пошта со години генерира загуби и покрај тоа што има милионски зделки по привилегирани цени за разлика од 39те приватни оператори. Годинава состојбата е најкритична, бидејќи по пропаста на Еуростандард банка остана и без приходите од платниот промет, а поради пандемијата има и пад на приходите, особено во меѓународниот сообраќај.
Инаку Пошта со години е прибежиште на кадри на ДУИ, кои со неа директоруваа цели 16 години. Во тој период се случи грабеж и голем пожар во главната пошата во Скопје, но епилог на овa се уште нема.
Александра Филиповска