Под посебни безбедносно- здравствени мерки хрватската дијаспора денеска гласа на предвремените парламентарни избори.
Во време на скок на бројот на новозаболени од корона вирусот на Балканот, бирачките места во Босна и Херцеговина денеска беа полни со гласачи.
Според аналитичарите ова се едни од најнеизвесните избори.
Според последните истражувања, тесна победа би можела да постигне Рестарт коалицијата, собрана околу опозициската СДП, од каде и дојде актуелниот претседател Зоран Милановиќ, но се верува дека поголем коалициски потенцијал има досегашниот премиер Андреј Пленкович и владејачката ХДЗ, што се очекува да биде клучно за формирање на нова влада.
Редовните парламентарни избори во Хрватска требаше да се одржат во декември оваа година, но поради епидемиолошката состојба предизвикана од коронавирусот, донесена е одлука тие да се спроведат неколку месеци порано.
Официјално, изборната кампања траеше само 15 дена, неофицијално траеше многу подолго, оценуваат хрватските медиуми.