Глобалните предизвици за сигурноста на храната не биле толку сериозни со години, е оценката на Организацијата за храна и земјоделство на Обединетите нации. Причина за тоа е пандемијата со Ковид-19 и климатските промени. Најзасегнати се новите генерации кои ќе живеат со директните последици од климатските промени и нефункционалните земјоделско-прехранбени системи, предупредува Организацијата на светскиот ден на храната.
И Македонија не е исклучок од светските трендови. Производителите на органска храна велат дека расте свеста за важноста на органската храна кај нас. Сепак новите генерации и ретко се одлучуваат за производство на истата.
Треба многу повеќе. Сметам дека младите не се баш толку многу заинтересирани за општо производство не па органско и сметам дека тука малку повеќе треба да се поработи на мотивација на тие луѓе, како од институциите и треба да се направи пазар кој ќе го подржи сето тоа, вели Горан Балески, производител на органска храна.
Биодиверзитетот е многу важен смета Неделковски кој се занимава со одгледување на кози и производство на козји млечни производи. Заедно со повеќе производители на органска храна ги претставија своите производи во Public Room и ги споделија предизвиците со кои сега се соочуваат.
Тоа е врзан синџир бидејќи се занимаваме со тоа и ги следиме работите ние сме зависни од сточната храна, сточната храна од ѓубривото, а тоа е зависно од нафтата, така што тие работи се комплексни, вели Давид Неделковски, производител на органска храна.
Според податоците на Организацијата за храна и земјоделство на Обединетите нации дури и пред Ковид-19, стотици милиони луѓе ширум светот беа погодени од глад – и тој број се зголеми во последната година до 811 милиони, и покрај тоа што светот произведува доволно храна за да не нахрани сите. Во исто време, 14 проценти од храната што се произведува се губи, а 17 проценти се фрла.
Нина Стефанова