По втор пат се одложи судењето за Харис Качапор обвинет дека на пешачки смртно го прегази поранешниот директор на ОХИС Јорго Ќука.
Од вчера тој ангажирал нова адвокатка бидејќи претходниот адвокат две дена пред стартот на судењето се откажал од тоа да го застапува. Сега новата адвокатка бара време да се запознае со доказите па да почне со одбрана. Обвинителката негодуваше поради ваквото одолговлекување на стартот на судењето.
„ И мојот впечаток и впечатокот на обвинителството, се надевам дека и вашиот впечаток е дека се оди беспотребно кон одолговлекување на судската постапка. Верувам и се надевам дека во одбраната дека понатаму нема да имаме вакви непотребни одолговлекување бидејќи како што кажав и во самата судница ние уште од самиот почеток на оваа јавна распрва сите докази врз кои што го темелиме обвинението се предадени па се надевам дека до наредната главна расправа ќе имаат време да ја подготват одбраната “ , изјави обвинителката Елена Жукола.
Судијката го опомена обвинетиот дека целосното негово однесување ќе го земе пред вид кога ќе ја носи одлуката на крај и тоа би можеле да бидат отежителни или олеснителни околности. Предупреди дека на следното рочиште ќе го започне процесот бидејќи веќе се искористени сите можности за одложување. Адвокатот кој го застапува семејството Ќука очекува правична постапка.
„Судијата Алексова е писмен и вреден судија и јас се надевам, како што и самата најави, дека нема да дозволи понатамошни одлагања од овој тип и карактер. Очекувам постапката да започне во нормален тек но ние не можеме да прејудицираме каква ќе биде одлуката на обвинетиот на следното рочиште. Ако признае вина, постапката тука ќе зварши но ако не признае вина ќе не чека малку подолготрајна постапка“, рече адвокатот Јанаки Митровски.
Инаку Качапор одговара за тешки дела во сообраќајот за кое предвидена е казна од најмалку 4 до 20 години затвор. Сообраќајката се случи на 3-ти ноември на булеварот Гоце Делчев. Според обвинението пред крстосницата со улицата „Лазар Личеноски“, на пешачки возел 53 км/час. Со предниот дел од возилото удрил во велосипедот па од ударот Ќука се здобил со тешки телесни повреди и починал на место.
Во обвинението стои дека е претходно осудуван. Тој во предметот Синџир за делата злосторничко здружување даночно затајување и перење пари се спогоди со обвинителството и доби условна казна.
По сообраќајката, го оставил возилото и отишол на лекар, а Мвр тогаш соопшти дека е приведен после три и пол часа од сообраќајката. Иако не беше на лице место, тоа што бил пронајден во болница беше образложение дека не избегал од несреќата. За него има само мерки на претпазливост.
Јорго Ќука на јавноста и е познат како прв човек на поранешниот гигант во хемиската индустрија ОХИС на чие чело беше повеќе од две децении.
Билјана Николовска