Европската Унија ја додаде Иранската исламска револуционерна гарда на својата листа на терористички организации, во одговор на смртоносните операции на официјален Техеран против анти-владините демонстранти минатите недели.
Според шефицата на европската дипломатија, Каја Калас, министрите за надворешни работи на европските земји се решиле на овој чекор, затоа што „репресијата не може да помине без одговор“.
Иранската револуционерна гарда, значајна воена, економска и политичка сила во исламската република сега за ЕУ е на исто ниво како џихадистичките групи Ал-Каеда и ИСИС.
Според проценките на групите за човекови права, повеќе илјади демонстранти се убиени во Иран од страна на безбедносните сили, вклучувајќи ја и револуционерната гарда, во текот на безредијата во текот на јануари и декември минатата година.
Најмоќната вооружена сила на Иран, исламската револуционерна гарда, беше формирана набргу по исламската револуција од 1979-тата година, со цел да го брани теократскиот карактер на државата.
Се проценува дека во неа има околу 190 000 активни членови а поседува ресурси на земја, во воздух и на вода, како и контрола на стратешкиот воен арсенал на Иран.
ЕУ денеска донесе и одлука за нови санкции против шест ентитети и 15 поединци во Иран, вклучувајќи ги министерот за внатрешни работи, Ескандар Момени, јавниот обвинител, Мохамед Мовахеди Азад и судијата Иман Афшари.