Германските власти извршија рација во просториите на „Дојче Банк“ (Deutsche Bank) во Франкфурт и Берлин поради сомнение за перење пари. Јавното обвинителство во Франкфурт соопшти дека неименувани менаџери и вработени биле цел на денешната акција, која доаѓа само еден ден пред најголемата банка во земјата да ги претстави своите годишни резултати за 2025 година.
Истрагата ја спроведува специјалната единица за економски криминал на обвинителството во соработка со Сојузната криминалистичка полиција, пренесе агенцијата ДПА. Се верува дека истрагата е поврзана со претходните деловни односи на банката со странски компании кои и самите се осомничени за перење пари. Претресите се наменети за обезбедување дополнителни докази.
„Не може да се дадат дополнителни информации во врска со позадината на деловните односи, трансакциите извршени преку „Дојче Банк АГ“ и нивниот обем или за самите компании“, објасни портпаролот на јавното обвинителство.
Портпаролот на Дојче Банк ги потврди претресите.
„Потврдуваме дека јавното обвинителство во Франкфурт моментално спроведува истрага во просториите на „Дојче Банк““, изјави портпаролот за ДПА и додаде дека банката целосно соработува со јавното обвинителство.
„Дојче Банк“ и претходно беше обвинувана за неуспех во откривањето и преземањето мерки против перењето пари. Седиштето на банката беше предмет на рација во април 2022 година, додека националниот финансиски надзорен орган исто така додели специјален претставник за да го следи нејзиниот напредок во борбата против перењето пари.