Јамајканските власти ги повикаа граѓаните внимателно да ги следат владините известувања, откако ураганот „Мелиса“ се засили во бура од највисоката категорија 5 и се движи кон западниот дел на островот.
Според метеоролошките служби, се очекува ураганот да ја погоди Јамајка во текот на денешниот ден, а потоа да продолжи кон Куба и Бахамите.
Како последица на бурата седум лица загинаа во северниот Карибски регион, а властите предупредуваат на „значителни поплави“ и силни грмежи.
Категорија 5 претставува највисоко ниво на опасност според Сафир-Симпсоновата скала, со постојани ветрови над 250 километри на час.
Според податоците на јамајканската метеоролошка служба, ова ќе биде првпат по 174 години ураган со ваква сила да удри директно врз островот. Последен посилен ураган што ја погодил Јамајка бил „Гилберт“ во 1988 година, и тој бил со категорија 3.
Американски воен авион влезе во ураганот Мелиса
Министерството за одбрана на САД објави импресивни снимки од внатрешноста на ураганот Мелиса.
Екипаж од Резервниот оддел за метеоролошко разузнавање на американското воздухопловство, познат како „Ловци на урагани“, изврши неколку прелети низ бурата за да собере важни податоци за Националниот центар за урагани.
Мелиса се засили до категорија 5 додека се приближува кон Јамајка, со што се заканува со катастрофални поплави, одрони и голема штета. Бурата не се очекува да влијае врз САД.