Економијата заздравува, буџетот се полни, трговскиот дефицит се намалува, се намалува и невработеноста, а се зголемила просечната плата. Вака премиерот Зоран Заев и министерот за финансии Фатмир Бесими ги презентираа ефектите од четирите пакети мерки помош за економијата за справување со последиците од пандемијата со кооронавирусот, досега тешки 860 милиони евра, а кои овозможиле бруто домашниот производ во 2020 да заврши во минус само 4,5 проценти, а не со предвидените минус 8,7%.
„Согласно последните макроекономски и фискални движења и очекувањата во однос на меѓународното економско опкружување, домашната економија е предвидено да се врати на патеката на економски раст во 2021 година и да ги надмине шоковите предизвикани од пандемијата“, изјави премиерот Заев.
Заев и Бесими се пофалија дека наплатата на даноците во првиот квартал од оваа година е подобар од лани и годината претходно, кога немало пандемија, па приходите во буџетот во првиот квартал годинава се зголемиле за 4,4 проценти, а на даноците и придонесите за 5%. Позитивен тренд има и кај трговскиот дефицит кој во јануари се намалил за 29 проценти. И јавниот и државниот долг се во рамки на буџетските предвидувања, соопшти Бесими, со очекување до крајот на годинава јавниот долг да достигне 63,4 проценти, а државниот 53,2 проценти.
Освен буџетската и трговската позитива и невработеноста забележила тренд на намалување во 2020 година и тоа за 0,9 проценти споредено со годината претходно.
Но позитивните економски трендови малку им значат на 17.000 работници кои се уште ја чекаат платата за февруари поради неусвојување на петиот пакет мерки од страна на пратениците, за што Бесими се надева дека наскоро ќе се случи.
„Во однос на мерката за плати што ја добиваат фирмите, со цел да се компензира овој загубен период со амандманско решение се дава можност до 15 април да аплицираат за двата месеци, и за февруари и за март, и со тоа и тие износи што ги исплатиле за март како што предвидуваше законот и мерката, значи да може да се реализира од страна на фирмите. Аа со цел да се намалат административните постапки во однос на реализација на мерката, сега може да аплицираат со една апликација за двата месеци. Со тоа сметаме дека тој дел ќе се надмине и тоа за брзо време штом се изгласаат законите“, вели Бесими.
Освен работниците кои ги чекаат платите од помошта со петиот пакет мерки, од Владата најавија помош и за сите угостители кои вчера мораа да ги затворат своите објекти поради новите рестриктивни мерки.
Тамара Грнчароска