Францускиот претседател Емануел Макрон ги повика т.н. „средно големи сили“ да се здружат и спротивстават на САД и Кина, објави Блумберг. Макрон ја испрати порака за време на неговата посета на Азија, каде разговараше за сигурна пловидба низ Ормускиот теснец, како и јакнење на соработката со Јужна Кореја и со Јапонија.
„Наша цел не е да бидеме вазали на две хегемони сили. Не сакаме да зависиме од доминацијата, да речеме на Кина, ниту сакаме да бидеме премногу изложени на непредвидливоста на САД“, рече Макрон пред студенти во Сеул.
Францускиот претседател додаде дека европските држави делат заеднички вредности со земји како Јужна Кореја и Јапонија по прашањата на меѓународното право, демократијата, климатските промени и глобалното здравје.
Макрон наведе дека гледа и други земји како дел од таквиот сојуз, како Австралија, Бразил, Индија и Канада. Заедно, тврди тој, таа група може да соработува во областите вештачка интелигенција, вселена, енергија, нуклеарна енергија, одбрана, безбедност…
Макрон веќе долго заговара идеја дека Европа да биде противтежа на САД и на Кина. Наведе дека Франција не била консултирана за војната на Блискиот Исток и дека не учествува во неа.
„САД се голема земја“, истакна Макрон, но истовремено предупреди дека нивниот пристап носи ризик од отворање на „Пандорината кутија“.
„Не верувам дека ќе решиме ситуација само со бомбардирање или воени операции“, додаде францускиот претседател, алудирајќи на Иран, пришто како примери ги наведе Ирак, Сирија и Авганистан со порака „никогаш не успеваме“.