Група пратеници во Собранието денеска поднесоа предлог за пакет измени на шест закони со кои се регулираат платите на избраните и именуваните лица, со цел како што порачаа поправична распределба на буџетските средства.
Со предложените решенија се предвидува намалување на коефициентите за пресметка на платите, што според предлагачите е во согласност со Уставот и економските услови во државата.
Измените ќе ги опфатат платите на пратениците, министрите, судиите, јавните обвинители, членовите на судскиот и јавно-обвинителскиот совет, како и градоначалниците.
Намалувањето според нивните пресметки би изнесувало од 10.000 до 13.000 денари, а кај одредени функции и повеќе, со што, како што се наведува, ќе се обезбеди рационално користење на буџетските средства.
Предлагачите посочуваат дека заштедените средства ќе останат во Буџетот и ќе можат да се пренаменат за здравство, образование и социјална помош.
Пакетот закони е поднесен по скратена постапка, а од пратениците се бара широка поддршка за негово брзо усвојување.