Гилејн Максвел, осудена најблиска соработничка на сексуалниот предатор, Џефри Епстин, одбила да одговара денеска да одговара на прашања од членовите на комитетот за надзор на Претставничкиот дом на САД.
Максвел учествувала виртуелно на сослушувањето зад затворени врати од затворот во Тексас, каде ја отслужува 20-годишната затворска казна за трговија со луѓе.
Претседавачот на комитетот, републиканецот Џејмс Комер, изјави дека „како што било очекувано, Максвел се повикала на 5-тиот амандман“, односно уставно загарантираното право да не одговара на прашањата на конгресмените додека е под заклетва, за да не се инкриминира себеси.
„Ова е очигледно разочарувачки. Имавме многу прашања за неа за злосторствата кои таа и Епстин ги извршиле, како и прашања за можните соучесници во кривичното дело“.
Членовите на комитетот од Демократската партија, потврдија дека Максвел го искористила кусото појавување за да апелира за милост.
Но, барем според досегашните изјави на членовите на конгресниот комитет, Максвел е многу лоша личност, која не заслужува било каков имунитет.
Во објава на социјалните мрежи претходно, адвокатот на Максвел, Дејвид Оскар Маркус, напиша дека Максвел била подготвена целосно и искрено да одговори на сите прашања, доколку добие помилување од Претседателот Трамп.
„Само таа може да ја каже целата вистина. На некои можеби нема да им се допадне тоа што ќе го слушната, но вистината е важна“ – напиша адвокатот на Гилејн Максвел.
Претходно, во писмо испратено до членовите на комитетот пред обидот за сослушување на Максвел, група жени кои биле жртви на Епстин, апелираа до конгресмените да бидат скептични за секоја информација која ќе ја добијат од Максвел.
Тие ја критикуваат затоа што одбива да идентификува некои од мажите кои биле дел од мрежата на Епстин и затоа што не соработува со истражните органи. Секој посебен третман на Максвел или кредибилитет за нејзиното сведочење, би бил катастрофален за преживеаните на страотните злоупотреби, пишуваат некогашните жртви на Епстин.