Со специјализиран дрон да се мери загадувањето во Струмица и регионот, да се набават и шест нови рачни мерачи и уште толку мерни станици. Ова се дел од барањата на Струмичани како итни мерки против аерозагадувањето кое е алармантно високо речиси цела зима, но и голем дел од летите денови.
Освен тоа, граѓанските активисти побараа и вработувања на пет инспектори за животна средина, со што капацитетите на локално ниво ќе бидат многу посериозни за борба против аерозагадувањето. Граѓаните се крајно револтирани, но и емотивни, загрижени за колективното здравје.
„Со години градот живее во тивка дистопија, воздухот е загаден, водите се загадени, храната е загадена. Секое излегување од дома те пече во очи, те пече во грло, секој муабет е кој се разболел, кој плукал крв. Навистина состојбата е алармантна“, рече Милена Зафирова-еко активистка.
Листата на барања на екоактивистите има девет точки. Во нив се наведени и обезбедување на средства за акредитирана лабораторија, поголем буџет за заштита на животната средина, ревидирање на А и Б дозволите за работа на компаниите, но и камери на дивите депонии.
„Барањата се многу. Пораката е народот да се информира, да се грижи за своето здравје, да ги поддржува протестите, а власта да се загрижи за луѓето кои ги избрале за да имаат здрава нација, бидејќи вака нацијата се губи“, рече д-р Виолета Маџункова.
Од Општина Струмица велат дека сериозно го сфаќаат проблемот со аерозагадувањето и дека тој е приоритетен за локалната власт. Последните неколку седмици во општината се собираа раководителите од надлежните инситтуции и правеа интервентен план на дејствување за справување со аерозагадувањето.
Сузана Мицева