Градоначалникот на Град Скопје, Орце Ѓорѓиевски ќе претседателствува со Заедница на единиците на локална самоуправа (ЗЕЛС) и во наредните четири години. Негови потпретседатели се градоначалниците на општините Центар и на Чаир, Горан Герасимовски, односно Изет Меџити. Оваа одлука е донесена на денешната конститутивна седница на Генералното собрание на ЗЕЛС.
Градоначалникот на општина Прилеп Дејан Проданоски е избран за претседател на Надзорниот одбор на ЗЕЛС.
„Од страна на колегите градоначалници ми е дадена едногласна поддршка и доверба да продолжам да го водам ЗЕЛС како претседател во наредниот период. Се надевам дека ќе имаме многу прашања и состојби кои заеднички ќе ги надминеме. Во минатото имавме одредени потешкотии со кои се справувавме, имавме одредени кризи кои заеднички ги решававме. Ќе продолжиме да функционираме заеднички и обединето без да дозволиме политиката да се меша во овие процеси и во нашето дејствување се со цел подобрување на состојбите на општините, поголема децентрализација, особено фискална децентрализација на општините“, изјави Ѓорѓиевски.
Тој информира дека разговарале со колегите и останува нивна заложба во 2026 година – општините да добијат комунална полиција.
„Нешто што сериозно ќе ни помогне да воспоставиме ред, добра позитивна практика, ќе ни олесни, но ќе им олесни и на државните институции земајќи предвид дека многу од ресурсите на МВР во моментов се трошат за таа проблематика. Во перспектива таа проблематика би ја третирале ние како локална самоуправа“, потенцира Ѓорѓиевски.
Изрази благодарност до колегите за дадената доверба и шанса. – Сега имам цел мандат, за разлика од минатото кога имав речиси половина мандат да го водам ЗЕЛС, додаде Ѓорѓиевски.