Прашањето за територии, ограничување на војска и барањата за откажување на Украина од членство во НАТО се трите клучни области на несогласување кои би можеле да го забават мировниот процес за крај на војната, порача украински извор за „Си-Ен-Ен“.
Изворот прецизира дека прашањето за предавање на делови на Донбас, ограничување на армијата на 600.000 војници и откажување на Украина од членство во НАТО е неприфатливо за Киев во моментната форма. Истовремено, нагласи дека ситуацијата е „далеку од описот дека станува збор за ситни детали“.
Американската администрација оптимистично најавува голем напредок во преговорите за завршување на војната во Украина. Во Киев, пак, велат дека луѓето на Трамп создаваат разубавена слика на реалноста.
Првата голема пречка е чувствително прашање – дали Украина ќе препушти клучни територии во Донбас, што го анектира Русија, но сè уште не го освоила во целост. Станува збор за т.н. „појас на тврдини“, низа од силно утврдени градови кои се сметаат за клучни за украинската безбедност. Според претходните американски предлози, тоа подрачје би станало демилитаризирана зона под руска управа.
Второто прашање се однесува на ограничувањето на армијата на Украина на 600.000 војници. Извор од Киев порача дека се разговара за нов, поголем, број, но оти Украина бара дополнителни измени пред да се согласи на такво лимитирање на сопствените оружени сили.
И трето, и конечно, барањето до Украина да се откаже од амбициите за членство во НАТО е целосно неприфатливо за Киев. Изворот за „Си-Ен-Ен“ рече дека таква отстапка би направила „лош преседан“ и практично би дала на Русија право на вето над одлуките на западниот воен сојуз чија членка не е.