Кочанскиот суд определи мерка притвор на двајца првоосомничени во случајот со поткупот за Пулс, предистрага која беше отворена вчера. Обвинителството бараше притвор за двајцата даночни контролори во регионалната дирекција на УЈП во Штип, но судот на првоосомничените Драган Паунов и Дуле Димитриев им определи куќен притвор.
Двајцата се осомничени дека „ја искористиле својата службена положба и овластување и пристапот до податоци и информации за ненајавени контроли во правни субјекти – даночни обврзници и со цел да прибават противправна имотна корист и подароци му ги откривале информациите и го предупредувале за контролите одговорното лице во клубот Пулс во Кочани.“ Обвинителството ги товари за примање поткуп.
Сопствениците на Пулс, Дејан Јованов Деко и неговиот син веќе се во притвор, а за нив е отворена уште една истрага.
За уште 6-мина осомничени службеници во УЈП-Штип се определени мерки на претпазливост. Сите се осомничени за коруптивни дела поврзани со кабарето Пулс во кое, на 16-ти март во пожар загинаа 63-ца главно млади луѓе и над 210 беа повредени. Акцијата во УЈП Штип се реализира еден ден по стартот на судењето за таа трагедија.
