По скандалот со мито на директорот на Платежната агенција Илија Стоилев, стопирана е исплатата на средствата од европската ИПАРД 3 програма, вредна речиси 90 милиони евра. Од Министерството за финансии информираат дека досега се исплатени само околу 8 милиони евра, а обработката на нови апликации и потпишувањето договори е привремено запрено. Неофицијално под прашање се околу 560 договори вредни 65 милиони евра.Од Руралната коалиција предупредуваат дека доколку блокадата потрае, последиците за земјоделците ќе бидат сериозни, бидејќи многумина веќе инвестирале очекувајќи европска поддршка. Од Министерството за земјоделство соопштија дека прекинот на исплатите е мерка за заштита на системот и доказ за подготвеност во борбата против корупцијата. Сепак, неизвесноста околу реализацијата на ИПАРД 3, која треба да трае до 2027 година, го става под ризик опстанокот на бројни земјоделски стопанства и компании од преработувачката индустрија.
