Потребни се силни и одржливи партнерства со европските организации за унапредување на македонското културно наследство. Ова го кажа раководителката на канцеларијата за програмата „Креативна Европа“ за Македонија, на денешниот настан , на кој што присуствуваа претставници од институциите од културата, од невладиниот сектор и странски експерти.
Според Билјана Прентоска, партнерствата ќе овозможат изготвување на поуспешни проекти, особено откако од лани конкуренцијата на апликантите на европско ниво се зголемила. А, министерот за култура и туризам ги повика заинтересираните да ја посетат новата веб страница на „Креативна Европа“ за Македонија, на која ќе се информираат за програмите и за настаните што следуваат.
„Градењето на јаки партнерства со европските организации и институции, значи едни одржливи партнерства и затоа сакаме да им посочиме , односно да ги упатиме што повеќе да членуваат во европските мрежи и да се вмрежуваат со нивните колеги од земјите членки на „ Креативна Европа“ или во европските програми. Така навистина тие ќе можат да бидат во тек со актуелните политики на ЕУ во конкретните ресори, во случајот – културното наследство. Тоа ќе им помогне да ги конципираат нивните проекти“, изјави Билјана Прентоска, раководителка на канцеларијата на „Креативна Европа“ за Македонија.
„Македонското културно наследство не треба да остане затворено и не треба да остане во минатото. Туку треба постојано да го унапредуваме, да го промовираме, да го ставиме во рамките на развој на туризмот. Да биде поодржливо и повидливо. И сакам да упатам порака до сите чинители во културата, до сите национални установи, да ја користат нашата нова платформа , која што ја имаме преку Одделението за „ Креативна Европа““, рече Зоран Љутков, министер за култура и туризам.
Сотир Трајков