Дека Европската унија не е свесна за својата моќ во глобални рамки ја отсликува реалноста и ЕУ сè уште е во фаза на учење како да ја користи моќта што ја има, вели Ана Крстиновска од ЕСТИМА, во вечерашната дебата во „Топ тема“ на Телма ТВ.
„Една вообичаена споредба која што секогаш се споменува во овој контекст е дека ЕУ е економски џин, а политичко џуџе. Значи ги има економските алатки кои што ѝ даваат моќ на глобална сцена. Тука пред сè e огромниот пазар. Меѓутоа досега ЕУ ги користела сите тие придобивки главно во контекст на европското соседство, на земјите од северна Африка, од Источното партнерство, на земјите од Западен Балкан, односно кандидатите за членство. И ја користела таа економска моќ за цели поврзани за почитување на човековите права или за некоја условеност кај оние држави кои што се стремат да имаат поблиски односи со ЕУ. Меѓутоа, до пред неколку години не ги користела тие инструменти за постигнување на некоја геополитичка надмоќ“, посочи Крстиновска.