Алкалоид вечерва од 19 часот го пречекува Еурофарм Пелистер во рамки на дербито на 8.коло во ракометната Суперлига. Во првата пресметка сезонава скопскиот тим славеше во Суперкуп дуелот во Гевгелија со 33-30, а Алкалоид го победи битолскиот состав и во ланското големо финале во Купот. Тоа се првите два трофеи во клупските витрини на младиот клуб, па тренерот Кирил Лазаров очекува Пелистер да сака одмазда вечерва во „Автокоманда“.
„Не чека тежок натпревар и мислам дека Еурофарм Пелистер ќе сака да ни се реваншира за Суперкупот. Можам да кажам дека по играчи тие се и најдобрата екипа во Македонија и секако нѐ очекува тежок натпревар“, изјави Лазаров.
Алкалоид моментално е единствениот тим со перфектен ефект во Суперлигата со седум победи од седум натпревари, а актуелниот шампион има еден пораз од гостувањето во Скопје кај вечниот ривал Вардар.
Фото: Игор Паневски
