Во три од четирите потрошувачки блока, цената на струјата ќе поскапи од половина до два отсто, соопшти денеска претседателот на Регулаторната комисија Марко Бислимовски. Во просек струјата поскапува за 0,4 отсто за 88 проценти од домаќинствата во државата.
Ценовен шок за граѓаните нема да има. Регулаторната комисија ги соопшти новите цени на струја кои важат од понеделник, а кои се незначително повисоки од досегашните и се движат од 0.8 до 1,9 проценти во зависност од тарифниот блок. Во просек за 88 отсто од домаќинствата во државата кои со потрошувачката се во првиот и вториот блок струјата ќе поскапи за 0,4 отсто.
Бислимовски соопшти дека на универзалниот снабдувач „ЕВН Хоум“ му е дадена насока петнаесетте отсто од количините кои оваа година нема да ги покрие ЕСМ да ги набаува на слободен пазар на домашната берза и тоа во периоди кога цената на струјата е блиску до цената на ЕСМ дадена на тендерот и која изнесува 60 евра. Од регулаторната соопштија и дека на цената влијаеле и законските измени на владејачката ВМРО-ДПМНЕ кои беа изгласани во Собранието а со кои се применува на нова маржа од 9,9 проценти наместо досегашните 11,5 проценти.
Новата цена на електричната енергија за домаќинствата и малите потрошувачи почнува да се пресметува од 1 јули. На тендерот што го распиша универзалниот снабдувач „ЕВН Хоме“ беше прифатена цената на АД ЕСМ од 60 евра за мегават часови и покривање на 85 проценти од потребите, додека за останатите 15 проценти беа пристигнати три понуди, но ниту една не беше прифатена поради високата цена и во текот на идниот месец ќе се распише нов тендер.
Огнен Чанчаревиќ