Вечерва од 18 часот во Хамбург со жрепка ќе бидат одредени групите за првата фаза од Европското првенство во фудбал кое следната година ќе се одржи во Германија.
На шампионатот ќе партиципираат 24 селекции кои ќе бидат поделени во шест групи по четири, а до овој момент познати се 21 национален тим додека останатите три ќе ги дознаеме по одигрувањето на баражите кои се на програмата во март.
Во првиот сад меѓу носителите се репрезентациите на домаќинот Германија, Португалија, Франција, Шпанија, Белгија и Англија.
Унгарија, Турција, Романија, Данска, Албанија и Австрија се сместени во вториот квалитативен сад, а во третиот се наоѓаат Холандија, Шкотска, Хрватска, Словенија, Словачка и Чешка.
Во четвртиот до овој момент познати се три селекции и тоа актуелниот шампион Италија, Србија и Швајцарија, а останатите три се репрезентациите кои ќе бидат најуспешни во мартовските баражи.
Континенталното првенство ќе се одржи во периодот од 14 јуни до 14 јули, а место во вториот круг обезбедуваат двете првопласирани репрезентации како и најдобрите четири кои го освоиле третото место во групата.
ФОТО: Игор Паневски