Вечерва од 21 часот на стадионот Маракана во Рио де Жанеиро ќе се одигра 64. финалето во елитното фудбалско клупско натпреварување во Јужна Америка, Копа Либертадорес.
Флуминензе има историска можност за прв пат во 121 годишната историја да го освои престижниот трофеј додека Бока Јуниорс ќе се обиде по осми пат да се искачи на тронот во јужноамериканскиот клупски фудбал.
Шанса да се запише во историјата има и ѕвездата на Флуминензе, Марсело, кој има можност да стане 14. фудбалер што успеал да се радува на трофеј во двете елитни натпреварувања во Европа и Јужна Америка.
Според статистиката предност вечерва да слави има екипата од Буенос Аирес, која четири од шесте пехари ги освоила во соочувања со тимови од Бразил, а во походот кон трофејот биле совладувани Крузеиро, Палмеирас, Сантос и Гремио.
Сепак на страната на Флуминензе е фактот што игра на домашен терен во својот град и на својот стадион и конечно во клупската историја да го донесе големиот трофеј. Во единственото финале одиграно пред 15 години, Флуминензе беше совладан од ЛДУ Кито.
ФОТО: Игор Паневски