Македонската ракометна репрезентација во оваа ЕХФ-недела посветена на репрезентациите ќе одигра два пријателски натпревари со Грција во Солун. Од таборот на нашиот јужен сосед очигледно не се фокусираат на пријателскиот дел од двата дуели, бидејќи нивниот селектор веднаш упати остра провокација кон нашиот тим.
Јоргос Заравинас, селекторот на грчката ракометна репрезентација во изјава за официјалната интернет страница на федерацијата на нашиот јужен сосед упати провокација до македонската репрезентација, нарекувајќи ја Скопје.
„Сега сме во Солун и ја одработуваме првата недела од подготовките за нашиот нов успех, пласманот на Европското првенство. Оваа фаза е важна за нас и ќе одиграме два силни натпревари со Скопје“, вели Заравинас во дел од својата изјава.
Очигледно Грците и натаму имаат проблем со нашето име, без разлика на промената. Македонската ракометна репрезентација двата дуели со соседот ги игра во Солун на трети и четврти ноември со почеток од 17:30 часот. Нашиот тим се подготвува во Скопје, а заминува за Грција во четврток.