Навивачката група на најтрофејниот македонски клуб Вардар, побара од водечките луѓе на градот Скопје, претседателот на Советот, Трајко Славевски и градоначалничката Данела Арсовска да ги исплатат финансиските средства кои се наменети за помош на клубот.
Тие во соопштението потенцираат дека парите да бидат исплатени во рок од 48 часа, а во спротивно тие најавија радикализација.
“Упатуваме апел до претседателот на советот на Град Скопје, Трајко Славевски и градоначалничката Данела Арсовска, финансиските средства наменети за ФК Вардар, изгласани едногласно уште на 20.07.2023 да бидат доделени веднаш. Немате повеќе време за чекање!
Вашата пасивност во однос на ФК Вардар и меѓусебното префрлање на одговорноста, се недозволиви. Никогаш нема да прифатиме, било кој да има таков однос кон клубот на народот. Затоа, упатуваме јасно барање – постапете веднаш!
Доколку за 48 часа не постапите и не ја спроведете одлуката, најавуваме радикализација на борбата.
Не дозволувајте да бидете запомнети како луѓе кои свесно или несвесно го саботирале клубот на народот. Не дозволувајте повторно да треба да се огласиме по однос на ова прашање”, се вели во објавата на навивачката група Комити.
ФОТО: Игор Паневски