Селекторот на македонската фудбалска репрезентација Благоја Милевски денеска го објави списокот со 25 фудбалери повикани за квалификацискиот натпревар со Украина за пласман на Европското првенство, како и за пријателскиот дуел со Ерменија. Од тимот ќе отсуствуваат неколку имиња кои во минатото беа стандардни во националниот тим.
Милевски за овие октомвриски натпревари нема да смета на искусниот голгетер Илија Несторовски, како и на Дарко Велковски кој сѐ уште нема клуб. На списокот го нема ниту напаѓачот Доријан Бабунски, како и Давор Здравковски, кој на изминатите неколку собири добиваше повик. Стоперот Ѓоко Зајков е повреден, а во тимот се враќа Дарко Чурлинов, кој долго отсуствуваше поради здравствени проблеми. Тука повторно е и Ваљон Етеми, како и Тодор Тодоровски.
Тимот очекувано ќе го предводат голманот Столе Димитриевски, потоа капитенот Енис Барди, Елиф Елмас, Аријан Адеми, Езгјан Алиоски, Бојан Миовски, Александар Трајковски и уште неколкумина стандардни фудбалери.
Македонија на 14 откомври ѝ гостува на Украина во Прага во рамки на квалификациите за ЕП 2024, додека три дена подоцна во Струмица ја пречекуваме Ерменија на пријателски натпревар.
Првиот собир на репрезентацијата е закажан за идниот понеделник на 9 октомври во Скопје.