Со двете стартни победи во соочувањата со Данска и Црна Гора, македонската одбојкарска репрезентација го обезбеди пласманот во елиминациската рунда на Европското првенство.
До крајот на шампионатот не очекуваат уште соочувања со Холандија и Чешка во кои составот предводен од селекторот Јошко Миленковски ќе се обиде да забележи уште некој триумф со што би се обезбедила подобра позиција во осминафиналето.
“Двата натпревари кои планиравме и посакувавме да ги победиме ги добивме против Данска и Црна Гора. Целта ја остваривме со пласман во осминафинале, освен ако не се оствари некое црно сценарио затоа што и Црна Гора се уште има шанси. Но, никој во репрезентацијата не помислува тука да застанеме. Имаме уште два натпревари на кои секако сакаме да победиме, да се натпреваруваме и да уживаме. Ќе биде интересно одмерување на силите и против Холандија и против Чешка. Со победа би ја избегнале Италија во осминафиналето, и тоа би било убаво. Останува добро да се подготвиме и со поддршка од нашите навивачи да дојдеме до нов успех”, рече селекторот Милевски.
Следниот натпревар репрезентацијата на Македонија го игра утре од 17 часот, а противник ни е селекцијата на Холандија.
ФОТО: Игор Паневски