Предводникот на македонската фудбалска репрезентација денеска го објави списокот со 27 фудбалери кои ќе бидат во конкуренција за претстојните квалификациски дуели со Италија и Малта.
“Сакаме да покажеме дека Македонија е конкурентна и покрај проблемите со кои се соочуваме. Ќе го дадеме максимумот, момците ќе бидат подготвени за предизвикот и мислам дека атмосферата во националниот тим ќе биде добра и позитивна. Без разлика на резултатите, Македонија заслужува поддршка од трибините и се надевам дека стадионот ќе биде исполнет до последното место. Македонија може да биде добра само ако функционира како тим и наша должност е сите да се ставиме во функција на тимот, само така може да се надеваме на успешни настапи. Факт е дека постојано, освен со Португалија, секогаш ни недостасувале витални играчи, но составот е тој, изборот е тој, тоа е реалноста. Не сме фудбалска велесила. Тоа што ни се случи со Англија е можеби и добро, за да се спуштиме на земја и да почнеме од доле, да градиме тимски дух и тим”, истакна селекторот Милевски.
Дуелот против Италија се игра на деветти септември на арената Тодор Проески и почнува во 20 часот и 45 минути, а цената на билетите е 300 и 500 денари.
ФОТО: Игор Паневски