Уште еден од пакетот пет закони кои се носат со европско знаменце за реализација на договорот со „Бехтел и Енка“ за изградба на коридорите 8 и 10д, влезе во забрзаната собраниска процедура и тоа со експресно завршен прв ден од расправата во траење од еден час и десет минути. Расправата за измените на Законот за експропријација се водеше во речиси празната сала „Борис Трајковски“ во која пратениците од опозициската ВМРО-ДПМНЕ аргументираа зошто законот не треба да биде донесен, тврдејќи дека со законот се изедначуваат легално изградените со нелегално изградените објекти долж трасата на автопатите.
Пратениците од ВМРО-ДПМНЕ кои поднесоа три амандмани на предлог законот, ја спореа и финансискат рамка од 300 милиони евра дадена од владата за чинење на експропријацијата .
Министерот за финансии Фатмир Бесими беше единствениот кој денеска го бранеше предлог-законското решение.
Расправата за предлог-законот за експропријација пред Комисијата за европски прашања ќе продолжи в понеделник, кога и ќе се гласа по трите поднесени амандмани од ВМРО-ДПМНЕ.
Тамара Грнчароска