Промотивното видео со кое беа презентирани резултатите на владата во минатата 2022-ра година беше полно со снимки и инсерти од странство, а посочени на конкретни активности во Македонија. Промотивното видео беше прикажано на отварањето на конференцијата „Година на нови можности“.
Во делот за зајакната фискална децентрализација има фотографија од фисклна сметка на која се гледа дека производите се напишани на руски јазик, а меѓу нив е и познатата руска крема за кожа и за лекување на повреди и рани на кожата „Медо“.
Во истиот сет инсерти се гледаат снимки од убави и чисти маркети со подредени производи и наплатување на модерна каса при што се гледа дека и производите и маркетот не се домашни и не се снимени во маркети во Македонија.
„Странски“ инсерти имаше и во делот за земјоделството каде се прикажани големи полиња и парцели од воздух, и садење пченица во крупен план.
На новинарско прашање за странските маркети, премиерот Димитар Ковачевски рече дека најверојатно станува збор за ненамерна грешка од професионалците кои го креирале видеото и се извини во нивно име.
Миомир Серафиновиќ
