Железницата е критична инфраструктура и Македонски железници е витално претпријатие за државата, и затоа мораме да го стабилизираме, порача министерот за транспорт и врски Благој Бочварски.
Во овој момент сметам дека со сите потези и овие 200 милиони денари за покривање на трошоците за електрична енергија, владата покажува дека води грижа за претпријатијата и на некој начин и економијата, бидејќи ние сме витална транзинта земја, рече Бочварски.
Вели дека владата веќе дава субвенции за патничкиот превоз, како што прават и многу други држави затоа што ретко каде патничкиот транспорт е рентабилен. Токму затоа владата размислува и за либерализација на патничкиот железнички сообраќај.
Ние веќе ги подготвуваме законските измени, и од тој аспект можам да потенцирам дека од наредната година влегуваме во либерзлизација на железничкиот транспорт, со што ќе може и железници од други држави да вршат транспорт по нашите железници. Ние сметаме дека со тоа ќе овозможиме повеќе можности за нашите граѓани, рече Бочварски.
Според Бочварски, компаниите како Македонски железници и Македонски пошти се многу значајни за македонската економија, и поради тоа владата не дозволува тие да прекинат со работа.