Европската струја годинава недостапна. И да се јави потреба MЕПСО нема да може како лани, електрична енергија да влече од европската мрежа, затоа што на пазарите има сериозни недостаотци од струја. За ваквата состојба преносниот систем ги известил надлежните.
Минатата година за потребите на трговците со струја, МЕПСО влечеше струја од европската мрежа, но, сега со месеци не може да ги наплати парите од овие компании.
Фирмата на синот на поранешниот вицепремиер Муса Џафери, за оваа струја кон МЕПСО должи над 7 милиони евра, но никако да го врати долгот.
Освен овој трговец со струја, за балансираната енергија долг имаат и уште две фирми, „Мист Енерџи“ и „Енергија гас и Повер“. Но, цехот кој треба да го плати „У Повер“ е најголем.
Сите три компании добија и забрана за тргување со струја, но некои најдоа начин и повторно се вратија во игра. Тоа се случи со „Мист Енерџи“. Фирмата, иако има милионски долг кон МЕПСО и доби забрана за тргување, формираше нова компанија „Мист Енерџи Еко“ ДОЕЛ и повторно се врати на пазарот.
Од РКЕ тврдат дека проблемите од минатата година, нема да се дозволи да се повторат. Од комисијата најавија поригорозни мерки за фирмите трговци со струја.
Бислимовски уверува дека се работи и на тоа, сите кои ќе сакаат да тргуваат со струја да мора да имаат и повисоки банкарски гаранции, а не со гаранции на мали износи да прават милионски долгови кон МЕПСО, како што се случуваше до сега.
Инаку, трговците со струја за да не плаќаат електрична енергија по далеку повисока цена, ја користеа балансираната од МЕПСО, која пак ја влечеше од европската мрежа и се доведе во ситуација да добие опомена и можност да се плаќаат пенали.
Ирена Чачкова