Македонската машка ракометна репрезентација во мечот за третото место на Медитеранските игри во Алжир е поразена од Србија со 34:29.
Избраниците на селекторот Кире Лазаров добро го отворија мечот и во почетната фаза на моменти имаа и предност од три погодоци, но во продолжението Србија со серија од 7:3 не само што го анулираа нашето водство и на одмор заминаа со предност од 15:13.
И на почетокот од второто полувреме се водеше рамноправна борба. Во еден момент нашата селекција успеа и да го израмни резултатот, но набргу потоа противникот повторно стигна со плус три, а на половина од вториот дел поведе и со пет гола разлика.
Селекцијата на Србија оваа предност ја одржуваше до крајот на натпреварот за конечен триумф од 34:29.
Најефикасни во редовите на Македонија со по пет гола беа Петар Атанасијевиќ и Костадин Петров, а по три пати прецизни беа Томислав Јагуриновски, Александар Петровски и Мартин Серафимов.
ФОТО: Игор Паневски