Триесет проценти се зголемува цената на такси услугата, од утре штипјани само што ќе го повикаат такси возилото пред нивниот дом ќе ги чини 70 денари, а секој километар дополнителни 25 денари.
Такси превозниците одлуката ја донесоа на синоќешниот состанок, со што го укинаа гратис километарот. Висината на стартот не се менува, бидејќи е потребна одлука на Советот на општината. Новите пресметки значат драстично зголемување на пододолгите релации.
Доколку нема владини мерки за стабилизирање на цените на горивата тогаш ново поскапување ќе има уште еднаш во јули и на почетокот од септември. Во меѓувреме очекуваат промена во Законот за патен сообраќај, со кој ќе се предвиде секоја компанија сама да си ја формира цената во пазарни услови. Штипјани со години бараат јавен градски превоз, но на последниот тендер ниту една фирма не се пријавила. Општина Штип сега повторно ќе распише нов, но со изменети услови.
Општината ќе го субвенционира градскиот превоз, се очекува да стартува во септември, кога во училиштата и на факултетите се враќаат учениците и студентите. Дотогаш штипјани ќе мора да ги менуваат навиките за да пристигнат до одредена дистинација.
Викторија Димитрова Јованова