Ракометарите на Вардар на гостувањето во Битола го совладаа Еурофарм Пелистер со 26:23 и се на чекор до одбрана на шампионската титула.
“Црвено-црните” се реваншираа за поразот во првиот дел од разигрувањето за трофејот и го растурија сонот на вечниот ривал по 17 години да се врати на тронот во македонскиот машки ракомет.
Клучни за победата на Вардар беа завршните минути од натпреварот кога Битолчани направија серија грешки кои составот на Давид Дејвис успеа да ги казни и да обезбеди предност со која се надополни негативата од првиот натпревар во Скопје и се направи крупен чекор кон одбрана на титулата.
Во поголемиот дел од натпреварот противниците беа израмнети, Вардар на моменти во првиот дел имаше предност од три погодоци, но Еурофарм Пелистер успеваше да се врати во игра и на одмор се замина со резултат 11:11.
На стартот од второто полувреме Вардар поведе со 14:12, но домаќинот повторно се враќаше во игра и во еден момент поведе со 22:21.
На три минути пред крајот Вардар со серија од 3:0 стигна до предност од 24:22, а по грешката на Стипе Мандалиниќ, гостите поведоа со 25:22 по што беше јасно дека гостите ќе стигнат до посакуваниот триумф.
Најефикасен во составот на Вардар со десет гола беше Моралес, Талески постигна шест, а голманот Борко Ристовски забележа осум интервенции. На спротивната страна прв стрелец со пет погодоци беше Обрадовиќ, Граѓан додаде четири додека голманот Секељи имаше 12 одбрани.
ФОТО: РК Еурофарм Пелистер